वाचनमा मिठास हुन्छन् बहरे ती गजलहरू
भाव पक्ष सन्तुष्ट छन् खहरे ती गजलहरू ।
लाग्छ आधुनिकता कतै भित्रिएको हो हजुर
स्वतन्त्र भई बहदैछन् लहरे ती गजलहरू ।
झुप्रादेखि महलसम्म शब्दरूपी प्रहारले
देख्दा राम्रा नलागे नि पहरे ती गजलहरू ।
केही मिलन बिछोड बोकी प्रेम यो संसारमा
निकै मज्जाले जम्छ है जहरे ती गजलहरू ।
गाउँ बेंशीका गजलहरू प्रकृतिमा निमग्न छन्
दुःख अभाव बोक्या हुन्छन् शहरे ती गजलहरू ।
सूर छैन ताल छैन शब्दमात्र बगेका छन्
फाट्टफुट्ट देखिँदैछन् रहरे ती गजलहरू ।
शब्दसागर उर्लिएर फाँटबाट माथि उठे
साहित्यलाई सिञ्चन गर्दै नहरे ती गजलहरू ।
Copyright © All right reserved to webtvkhabar.com Site By: SobizTrend Technology