वेबटिभी खबर
काठमाडौं । सभामुख अग्नि सापकोटाविरुद्ध जारी मुद्दाको पेसी चढेको छ । सर्वोच्च अदालतको संवैधानिक इजलासमा बुधबार सो मुद्दाको पेसी चढेको हो । प्रधान न्यायाधीश चोलेन्द्र शमसेर जबरा अध्यक्ष रहेको इजलासमा न्यायाधीशहरू दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडा छन् । नियमित पेसीमा चढे पनि धेरै मुद्दाहरु त्यसभन्दा माथि रहेकाले बुधबार सुनुवाइ हुने यकिन छैन ।
माओवादी युद्धका बेला अपहरणपछि मारिएका काभ्रेका अर्जुन लामाको हत्यामा सापकोटा प्रमुख दोषी रहेको भन्दै ०६८ सालमा मुद्दा दायर भएको थियो । यसअघि पटकपटक सुनुवाइको पेसी तोकिएको यो मुद्दाको सुनुवाइ भने हुन सकेको छैन । लामापत्नी पूर्णिमाया लामा, मानव अधिकारकर्मी सुशील प्याकुरेललगायतले ६ असार ०६८ मा मुद्दा दर्ता गराएका थिए । सो मद्दामाथि प्रारम्भिक फैसला गर्दै तत्कालीन न्यायाधीश सुशीला कार्की र ओमप्रकाश मिश्रको इजलासले उक्त मुद्दा संवैधानिक इजलासमा जाने आदेश गरेको थियो ।
लामापत्नी पूर्णिमायाले ७ मंसिर ०६९ मा पतिको हत्यामा सापकोटाको हात रहेकाले तत्काल कर्तब्य ज्यानमुद्दा अघि बढाउन माग गर्दै रिट निवेदन दायर गरेकी थिइन्। ।
Copyright © All right reserved to webtvkhabar.com Site By: Sobij
