काठमाडौं– साडियो मानेले लिभरपुलको लागि १००औँ गोल गरेको खेलमा लिभरपुलले क्रिष्टल प्यालेसमाथि सहज जित निकालेको छ ।
शनिबार साँझ घरेलु मैदान एनफिल्डमा भएको खेलमा लिभरपुलले क्रिष्टल प्यालेसलाई ३–० गोल अन्तरको पराजित गरेको हो ।
अपराजित लिभरपुलको जितमा साडियो माने, मोहम्मद सलाह र नेबी केइटले १–१ गोल गरे । पहिलो हाफको अन्तिम दुई मिनेट बाँकी रहँदा लिभरपुलले १–० को अग्रता बनायो । गोलरक्षकको रिबाण्ड बललाई मानेले जाली चुमाएका थिए । मानेको यो लिभरपुलका लागि १००औँ गोल हो ।
खेलको ७८ मिनेटमा मोहम्मद सलाहले दोस्रो गोल गरे । उनले भान डाइकको पास सदुपयोग गरेका थिए । खेल सकिन एक मिनेट बाकी रहँदा केइटले गोल गर्दै ३–०को जित दिलाए ।
जितसँगै लिभरपुल ५ खेलबाट १३ अंकसहित शीर्ष स्थानमा छ । समान १० अंकसहित ४ खेल खेलेका म्यानचेष्टर युनाईटेड, चेल्सी र एभर्टन लिभरपुल भन्दा तल रहेका छन् ।
Copyright © All right reserved to webtvkhabar.com Site By: Sobij
