राजन गाैतम
आमाको ममतालाई बुझ्न सक्ने छ को यहाँ ?
घैटोले मृत्तिकालाई बुझ्न सक्छ कथम् यहाँ ?
आमा हुन् सृष्टिकी देवी नमस्कार छ पाउँमा ।
आमा हाँसे सबै हाँस्छन् त्यो मेरो प्रिय गाउँमा ।।
आमाको सामुमा सप्पै महत्त्वहीन बन्दछ ।
सूर्यको छेउमा दीप कसरी बल्न सक्दछ ?
आमा हुन् शिक्षिका हाम्रो पढाउँछिन् सिकाउँछिन् ।
आफू सहेर कष्टादि हामीलाई हसाउँछिन् ।।
खोज्दछौं देवता हामी मस्जिद्, मन्दिर चर्च्–तिर ।
आमा हो देवता हाम्रो के जानु खोज्न बाहिर ।।
निर्गुण र निराकार चाहिन्न देवता बरु ।
दर्शन प्राप्त होस् नित्य हुन् सबै बकवास् अरू ।।
वृद्धाश्रम लगी छोड्छन् आमालाई कठै यहाँ ।
यस्ता पापी पनि हुन्छन् के लेखूँ कविता यहाँ ?
आमालाई खुसी पारौं सेवा गरौं सधैंभरि ।
आमा खुसी भए मिल्छ आनन्द जिन्दगीभरि ।।
हुन् सबै वस्तु मिथ्या नै आमाबाहेक सृष्टिमा ।
आमा मात्रै परं सत्य हो मेरो सूक्ष्मदृष्टिमा ।।
Copyright © All right reserved to webtvkhabar.com Site By: SobizTrend Technology
