वेबटिभी खबर
काठमाडौं । नेकपा एकीकृत समाजवादी (एस) ले सर्लाही जिल्लाको दुर्गम स्थानमा सहज रूपमा मतदाता नामावली संकलन नभएकोप्रति निर्वाचन आयोगको ध्यानाकर्षण गराएको छ । एसका जिल्ला अध्यक्ष सुरेन्द्र लामाले शुक्रबार एक विज्ञप्ति जारी गर्दै ध्यानाकर्षण गराएका हुन् ।
‘निर्वाचन आयोगले पालिका केन्द्रमा मात्र मतदाता नामावली संकलन टोली पठाउँदा सर्लाही जिल्लाको दुर्गम भेग, यातायात नचल्ने स्थान र पालिका केन्द्रमा पहुँच सहज नभएका बासिन्दा मतदाता बन्नबाट वन्चित हुने अवस्था देखिन्छ । उदाहरणको लागि सर्लाहीको अति दुर्गम नारायणखोलासहित लालबन्दी, इश्वरपुर, हरिवन र बाग्मती नगरपालिकाका विभिन्न पहाडी इलाकामा स्थलगत रूपमा टोली पठाउन नसक्दा धेरै मतदाता यो अभियानबाट वाहिर नै पर्ने स्पष्ट छ । जिल्लाको दक्षिणी क्षेत्रका कतिपय स्थानमा पनि टोली पठाउन आवश्यक छ,’ अध्यक्ष लामाद्वारा जारी विज्ञप्तिमा भनिएको छ ।
जिल्ला निर्वाचन कार्यालयले सदरमुकाम मलंगवामा राखेको कार्यालय प्रमुख र दलको गोष्ठीमा नेकपा एसले त्यस्ता केही खास स्थानमा स्थलगत रूपमा टोली पठाउन सुझाव दिएको थियो ।
निर्वाचन कार्यालय सर्लाहीका प्रतिनिधिले उक्त सुझावलाई निर्वाचन आयोग नेपालमा पठादिने वचन दिएका थिए । तर, हालसम्म त्यस्ता विकट स्थानमा टोली जाने बारेमा योजना बनेको छैन । ‘सर्लाहीका विकट स्थानमा स्थलगत रूपमा टोली पठाइ सहजरूपमा मतदाता नामावली संकलन गर्न निर्वाचन आयोग नेपाल र सम्वन्धित कार्यालयहरूसँग हामी गम्भीर रूपमा माग गर्दछौं,’ विज्ञप्तिमा भनिएको छ ।
Copyright © All right reserved to webtvkhabar.com Site By: Sobij
