काठमाडौं । हरेक वर्ष झै २०२१ मा राम्रा, नराम्रा सबै प्रकारका समाचार बाहिरिए । सन् २०२१ को अन्त्य र २०२२ को आगमन हुँदैछ । २०२१ मा धेरै व्यक्तिहरुको प्रेम सफल भयो । तर केही व्यक्तिहरुले यही वर्ष सम्बन्धविच्छेद गरे भने कोही प्रेमसम्बन्धबाट अलग्गिए । बलिउड क्षेत्रमा पनि सम्बन्ध जोडिने र छुट्टिने क्रम जारी नै रह्यो । 

बलिउड अभिनेता आमिर खान र किरण रावले यस वर्ष वैवाहिक सम्बन्धको अन्त्य गरे । उनीहरुले आपसी समझदारीमा दाम्पत्य जीवनबाट अलग रहने निर्णय गरेका हुन् । यस जोडीले जुलाई २०२१ मा आफ्नो १५ वर्ष पुरानो वैवाहिक सम्बन्ध अन्त्य गर्न लागेको जानकारी दियो । ‘बितेका १५ वर्षमा हामीले एकसाथ जीवनभरको अनुभव, सुखदुख साटासाट गर्यौ’ एक संयुक्त बयानमा उनीहरुले भनेका छन्, ‘हामीहरुको सम्बन्ध विश्वास, सम्मान र मायाले अगाडि बढिरहेको छ ।’

बलिउड अभिनेत्री किर्ती कुल्हारीले आफ्नो ५ वर्षदेखिको वैवाहिक सम्बन्ध अन्त्य गर्ने घोषणा गरिन् । किर्ती र साहिलले सन् २०१६ मा विहे गरेका थिए । एक नोट साझा गर्दै किर्तीले लेखेकी छिन्, ‘मेरो श्रीमान् साहिल र मैले अलग रहने निर्णय गरेका छौं ।’ 

  
२०२१ मा अलग भएका बलिउड क्षेत्रका जोडीमध्ये एक हुन् हनी सिंह र शालिनी तलवार । सेलीब्रेटी र्यापर हनी सिंह र उनको श्रीमतीको मुद्धा यस वर्ष धेरै चर्चामा रह्यो । सम्बन्धमा तिक्तता आएपछि यीनीहरुको मुद्धा अदालतसम्म पुग्यो । ३ अगस्टमा शालिनीले आफ्नो श्रीमान् हनी सिंहविरुद्ध घरेलू हिंसा, यौन हिंसा, मानसिक उत्पीडन र आर्थिक हिंसाको मुद्धा दर्ता गरिन् ।

क्रिकेटर शिखर धवन र आयसा मुखर्जीले ८ वर्ष पुरानो सम्बन्धलाई यस वर्ष अन्त्य गरे । आयसाले इन्स्टाग्राममा पोष्ट लेख्दै आफू दुई पटक सम्बन्धविच्छेद गर्ने महिला भएको जानकारी दिइन् । उनीहरु सन् २०१२ मा वैवाहिक बन्धनमा बाँधिएका थिए । यस दम्पतिको एक छोरा छन् । आयसा मेलबर्नमा बस्छिन् ।

 सामन्था रुथ प्रभुले पनि अक्टुबर २०२१ मा आफ्नो श्रीमान् नागा चैतन्यसँग सम्बन्धविच्छेद गरिन् । उनीहरु सन् २०१७ मा वैवाहिक सम्बन्धमा बाँधिएका थिए । यस जोडीलाई पर्दा र वास्तविक जीवनमा धेरै रुचाइएको थियो । उनीहरुको सम्बन्धविच्छेदको खबर बाहिरीएसँगै दर्शकहरुले दुःख व्यक्त गरेका थिए ।