काठमाडौं । शिक्षक सेवा आयोगले माध्यामिक तह शिक्षक पदपूर्तिका लागि विज्ञापन खुलाइसकेको छ । यही पुस १० गतेभित्र निम्न माध्यमिक तह र २१ गतेभित्र प्राथमिक तहका लागि विज्ञापन आह्वान भइसक्ने आयोगले जनाएको छ ।
आयोगका सूचना अधिकारी सुदर्शन मरहठ्ठाले आइतबार वेबटिभी खबरलाई दिएको जानकारीअनुसार यही पुस २९ गतेसम्म फारम भर्न सकिनेछ । यसरी क्रमशः विज्ञापन खुल्दै गर्दा मानिसहरूको चासो भने उमेरसम्बन्धी छ ।
कति उमेरसम्मले दरखास्त दिन पाउने हाे ? भन्ने चासाे धेरैकाे छ । त्यसका लागि उमेर तोकिएको छ । १८ वर्ष पुरा भई २०७८ पुस २९ गतेसम्म ४० वर्ष नकटेका व्यक्तिहरूले आयोगको फारम भर्न पाउने सूचना अधिकारी मरहठ्ठाले जानकारी दिए । पुस महिना ३० को छ । यस मितिमा ४० वर्ष पुरा भएको व्यक्तिहरूले फारम भर्न पाउने छैनन् ।
त्यसैगरी प्रारम्भिक बालविकास सहकर्ता (इसीडी शिक्षक) ले शिक्षक सेवाकाे फारम भर्न पाउँछन् कि पाउँदैनन् भन्ने वेबटिभी खबरको प्रश्नमा आयोगका सूचना अधिकारी सुदर्शन मरहठ्ठाले भने, ‘सम्बन्धित विषयमा स्नातक पास गरेको हुनुपर्छ । अध्यापन अनुमतिपत्र (लाइसेन्स) हुनुपर्छ । र,१० महिना शैक्षिक तालिम लिएको हुनुपर्छ ।’ मरहठ्ठाको भनाइअनुसार इसीडी शिक्षकमा पनि सो योग्यता छ भने आयोगको फारम भर्न सकिन्छ ।
यदि विज्ञान, गणित र अंग्रेजीलाई मुख्य विषय बनाई स्नातक पास गरेका र हाल इसीडी शिक्षकको भूमिकामा काम गरिहरेकाहरूलाई भने १० महिनाको तालिम नचाइने मरहठ्ठाले बताए ।
हाल देशभर सामान्य साक्षरदेखि स्नातकोत्तर उत्तीर्ण गरेका इसीडी शिक्षकहरू छन् ।
Copyright © All right reserved to webtvkhabar.com Site By: SobizTrend Technology