काठमाडौं । मकवानपुरको विकट राक्सिराङ गाउँपालिकामा विद्युत विस्तार योजना अधुरै रहेको छ । चार वर्ष अघि थालिएको सो कार्य हालसम्म पूरा हुन नसक्दा विस्तारको काम अधुरो बनेको हो ।
विसं २०७५ मा विद्युत् विस्तारको काम एक वर्ष भित्र सम्पन्न गर्ने गरी अघि बढाइएको थियो । ठेकेदार र नेपाल विद्युत् प्राधिकरणको ढिलासुस्ती र लापरवाहीका कारण राक्सिराङ गाउँपालिकाका नौ वटै वडामा विद्युत् विस्तार हुन सकेको छैन ।
काठको खम्बा विस्थापित गर्ने योजनाका साथ प्राधिकरणको बैंक खातामा गाउँपालिकाले एक करोड रुपैयाँ जम्मा गरेको थियो । उक्त रकममा प्राधिकरणले एक करोड थपेर काम अघि बढाएको थियो ।
गाउँपालिकाका अध्यक्ष राजकुमार मल्लका अनुसार पटकपटक ताकेता गर्दासमेत प्राधिकरणले विद्युतीकरणको काममा ध्यान दिएको छैन ।
प्राधिकरणको हेटौँडा वितरण केन्द्रको कार्यालयमा रहेको अभिलेखअनुसार गाउँपालिकाको खैराङ–खुर्कोट क्षेत्रमा ३४५ बिजुलीको पोल लगिएको छ । तर सो क्षेत्रमा ७५ पोल मात्र रहेको पाइएको छ ।
प्राधिकरणको प्रतिवेदन अभिलेखमा सबै काम भएको पाइए पनि सो गाउँपालिकाको विभिन्न स्थानमा खम्बा, तारलगायत सामग्री यत्रतत्र छरिएर रहेको अध्यक्ष मल्लले बताए।
विद्युत् प्राधिकरण, ठेकेदार कम्पनी, कर्मचारी र वडाध्यक्षका कारण काममा ढिलाइ भएको अध्यक्ष मल्लको आरोप छ । सो क्षेत्रमा चेपाङ र तामाङ समुदायको बसोबास रहेको छ ।
Copyright © All right reserved to webtvkhabar.com Site By: SobizTrend Technology