महोत्तरी । महोत्तरीको सागरनाथ जंगलभित्र मृत अवस्थामा फेला परेकी महिलाको हत्या गरी फालिएको पाइएको छ ।  हत्यामा संलग्न भएको आरोपमा मृतकका श्रीमान अजय महतो कोइरी र उनका सहयोगी प्रमोद राउतलाई प्रहरीले आइतबार सार्वजनिक गरेको छ । 

५ दिन अगाडी गौशाला नगरपालिका–१२ कान्तिबजार जाने बाटोमा रेल्वे लिकभन्दा ५ सय मिटर अगाडी पहिचान खुल्न नसकेकी महिलाको शव फेला परेको थियो । मृत महिला भारतको सितामाढीकी राधा भनिने अपसना खातुन रहेको जिल्ला प्रहरी कार्यालय महोत्तरीले जनाएको छ ।

कसरी हत्या भयो ?

मृतक राधा भनिने अपसना खातुन सर्लाहीमा ज्याला मजदुरी गर्ने गर्थिन् । यसैक्रममा २ बर्ष अगाडि पेटी ठेक्कापट्टा गर्ने अजय तिवारीसँग भेट भयो । अजय र राधाको नजिकपना बढ्दै गएपछी उनीहरुबीच प्रेम झाँगियो । उनीहरुले प्रेमसम्बन्धलाई २ बर्ष अगाडीमात्र विवाहमा परिणत गराएका थिए ।

राधाको अजयसँग दोश्रो बिवाह हो । २ बर्ष अगाडि नै राधाको पहिलो श्रीमानसँग सम्बन्ध बिग्रिएपछी उनी तनावमा थिइन् । सोही समयमा अजयसँगको भेट भएको थियो । उनका पहिलो श्रीमानको घर भारतको उत्तर प्रदेशमा हो ।

पहिलो श्रीमानबाट राधाका दुई छोरा छन् । दुई छोराहरुको पालन पोषणको सर्तमा हत्या आरोपित दोश्रो श्रीमान अजय साहले दुई वर्ष अगाडि विवाह गरे । नेपालमा बसेर काम गरेपनि अजय र मृतक राधाको माइती भारतको सितामाढी नै हो ।

अजयले प्रहरीलाई दिएको बयान अनुसार राधाले अजयलाई उनको घर भारतको बिहार प्रदेशस्थित सितामाढी लैजान निक्कै कर गरिन् । अजयले राधालाई घर लिएर गए । तर उनीहरुको सम्बन्धलाई परिवार र समाजले स्वीकार गरेन् । त्यसपछि उनीहरु पुनः सर्लाही नै फर्किए ।

सर्लाहीस्थित मलङगवामा कोठा भाडामा लिएर बसेका उनीहरुको दैनिक जेनतेन चलिरहेको थियो। राधाले श्रीमान् अजयलाई कोट म्यारिज गर्न, अधिकार दिन दबाब दिइन् । अजयले प्रहरीलाई दिएको बयानअनुसार आर्थिक कारोबारमा समेत राधाले बिस्तारै अजयलाई तनाब दिन थालिन् । तुरुन्त अधिकार नदिलाए जवरजस्ती करणीको मुद्दामा फसाउने धम्की समेत दिएपछी अजयले तनाव झेल्न नै सकेनन्।

कसरी बन्यो हत्या योजना ?

अजयका अनुसार ७ महिनाको गर्भवती समेत रहेकी राधाले निक्कै तनाव दिएपछि उनले उक्त पीडा आफ्ना साथीभाइलाई पनि भने ।

साथीभाई कै योजनामा अजयले भित्रभित्रै राधालाई जीवनवाट नै पन्छाउने योजना बुन्दै गए । लामो छलफलपछी अजयका साथी प्रमोद राउत र सँगै काम गर्ने एक जनाले हत्याको योजना बताए । प्रमोदले महोत्तरीको सागरनाथ जंगलमा लैजाने र त्यही हत्या गर्ने सुझाएपछी अजय र उनका सहयोगी पनि तयार भए ।

फागुन २ गते मेला हेर्न महोत्तरीको गौशालामा जाने भनेर सुनाएपछी राधा पनि निक्कै खुसी भइन् ।  श्रीमान अजय महतोले राधाका २ छोराहरुलाई पनि सँगै लिएर गए । साथमा प्रमोद राउत र अजयका अर्का एक जना सहयोगी पुरुष पछि–पछि थिए । 

उनीहरुले महिलालाई सागरनाथ जंगलको रेल्वे ट्र्याकमा लगेर सलले घाटीमा तीन फन्को बाँधे । दुवै जनाले राधालाई समाएर कन्चट र छातीमा लात्ता हाने ।  त्यसपछी पेटमा लाताले हानेर हत्या गरेपछि उनीहरुले रेल्वे ट्र्याकवाट २ सय मिटर अगाडि ल्याएर शव छाडेर भागे ।

अभियुक्त कसरी पक्राउ परे ?

महिलाको घाटीमा निलडाम र शरीरका विभिन्न भागहरुमा चोटपटक देखेपछि प्रहरी घटनाको अवस्था हेर्दै हत्या नै भएको निष्कर्षमा पुगेको थियो ।

अझ फाल्गुन २ गते बेवारिसे अवस्थामा गौशालामा नै फेला परेका दुई बच्चा प्रहरीलाई अनुसन्धान गर्न निक्कै सहज बन्यो । दुई बच्चा मध्ये एउटा बच्चालाई बुवाको नाम सोधपुछ गर्दा अजय बताएपछी प्रहरीले त्यसलाई पनि आधार बनायो ।

प्रारम्भिक अनुसन्धानमा आएका हरेक प्रमाणहरुलाई आधार बनाएर प्रहरीले महोत्तरीमा मात्र हैन सर्लाही र भारतमा समेत निगरानी बढायो । इलाका प्रहरी गौशाला, जिल्लाको अनुसन्धान विभाग र प्रदेशका प्रहरीले घटनालाई सुक्ष्म अध्ययन गरेपछि प्रहरीको आशंका श्रीमान तर्फ मोडियो ।

त्यस्को ५ दिनपछी भारतीय प्रहरीको सहयोगमा नेपाल प्रहरीले हत्याको आरोपित अजय महतो र प्रमोद राउतलाइ भारतको  सितामाढीबाट पक्राउ गरेको छ। हत्यामा संलग्न एक जना अझै फरार छन् । 

वेवारिसे अवस्थामा फेला परेका २ जना बालक मृतक महिलाको नै भएको पुष्टि भएको छ । उनीहरु महिलाको पहिलो पतिबाट जन्मिएका र उनीहरुलाई अभिभावकको जिम्मा लागाउने प्रहरीले तयारी गरेको छ । 

उनीहरुलाइ महिलासँगै ल्याएको भएपनि हत्या गर्ने योजना नभएको हत्या आरोपित अजय साहले प्रहरीको बयानमा भनेका छन् । अहिले बच्चाहरु स्थानीय दिनेश महतोको आश्रयमा छन् ।