गलेश्वर । देशको आर्थिक, सामाजिक, राजनीतिक तथा शासकीय पद्धति रूपान्तरणका प्रक्रियामा युवाको भूमिकालाई उच्च महत्व दिँदै आएको पाइन्छ । युगानुकूल भविष्यको परिवर्तनका भरपर्दा आधार नै सक्षम युवा भएकाले जिल्लामा हुने विकास निर्माणका काममा उनीहरूको सहभागिता बढ्दै गएको हो ।

युवाहरूको सहभागिताले विकास निर्माणका योजना पनि समयमै सम्पन्न हुन थालेका छन् भने समुदायप्रति जवाफदेही हुनुपर्ने भएकाले काममा पनि गुणस्तर देखिन थालेको छ ।बाहिरका कामदार ल्याएर विकास निर्माणका काम गराउँदा समयमै योजना सम्पन्न नहुने र बाहिरका कामदार समुदायप्रति जवाफदेही हुनु नपर्ने भएकाले सम्पन्न भएका अधिकांश योजना गुणस्तरहीन हुने गरेको थियो ।

स्थानीय युवा विकास निर्माणका काममा सहभागिता जनाएपछि यस्ता समस्या न्यूनीकरण हुँदै गएका छन् । विगत दुई वर्षयता कोरोना भाइसको जोखिमका कारण वैदेशिक रोजगारी गुमाएर गाउँ फर्किएका युवा अहिले गाउँघरमै हुने विकास निर्माणका योजनामा काम गरिरहेका छन् ।

स्थानीय तहले पनि विदेशबाट फर्केका स्थानीय युवालाई गाउँमा हुने विकास निर्माणका काममा पहिलो प्राथमिकता दिएपछि उनीहरूलाई सहज भएको हो । चालु आर्थिक वर्ष अन्त्य हुने समय तीन महिना बाँकी रहँदा जिल्लाका ग्रामीण भेगमा स्थानीय तहका योजना धमाधम निर्माण भइरहेका छन् ।

त्यसका साथै संघ र प्रदेशका योजनामा युवाले धमाधम काम गरिरहेका छन् । गाउँ फर्किएका युवा विकास निर्माणमा जुट्न थालेपछि बाहिरबाट मजदूर ल्याउनुपर्ने बाध्यता पनि हटेको छ । गाउँपालिकाले पूर्वाधार निर्माणलाई प्राथमिकतामा राखेर बजेट विनियोजन गरेका कारण वडास्तरमा रोजगारी सिर्जना हुन थालेको छ ।

गाउँकै युवा विकास निर्माणमा जुट्दा योजना निर्माण र कार्यान्वयन गर्न सहज भएको रघुगंगा गाउँपालिका-४ दग्नामका वडाध्यक्ष रूकबहादुर गर्वुजाले बताए । उनले भने, ‘आफ्नो गाउँमा निर्माण हुने विकासका योजनामा स्थानीय युवाको नै संलग्नता भयो भने योजना सम्पन्न गर्न, कार्यान्वयन गराउन र जिम्मेवारी दिन धेरै सजिलो हुँदो रहेछ ।’

स्थानीय युवाको संलग्नतामा दग्नाममका ९ वटा योजना निर्धारित समयभन्दा पहिला नै सम्पन्न भएको बताइएको छ । वडामा भित्रिएका विकास योजनाले गाउँमा रोजगारी सिर्जना भएको र युवा दैनिक रूपमा काम गर्न थालेको उनले बताए ।

‘कतारबाट फर्केको दुई वर्ष भयो, कोरोना भाइरस संक्रमणका कारण फर्केर कतार जान नसकेपछि गाउँमै काम गर्न थालें, अहिले यही बसेर गरेको कामबाट सन्तुष्ट छु ।’ रघुगंगा गाउँपालिका-१का सोनाम बिकले भने, ‘गाउँमा हुने विकास निर्माणका योजनाले गाउँको विकास पनि भएको छ र हामीजस्ता युवाले रोजगारी पनि पाएका छौं ।’

पालिकाबाट विनियोजन हुने बजेटका योजनामा मात्रै होइन, जलविद्युत् र सडकलगायत ठूला विकास निर्माणका योजनामा पनि विदेशबाट फर्केर आएका युवाको संलग्नता बढेको छ । एकातिर युवाहरूले रोजगारी पाएका छन् भने अर्कातिर गाउँमा आएको पैसा बाहिरिने दरमा पनि कमी आएको छ ।

विकास निर्माणका योजनामा स्थानीय युवाको सहभागिता बढेपछि जनप्रतिनिधिलाई पनि निकै सजिलो भएको रघुगंगा गाउँपालिका-१ का वडाअध्यक्ष बिलबहादुर फगामीले बताए । युवाले काम गर्न थालेपछि योजना कार्यान्वयनमा सहजता भएको उनको भनाइ छ ।

विकास योजनाका कारण गाउँमा बेरोजगारीको समस्यामा समेत कमी आएको स्थानीयवासी बताउँछन् । पहिला पहिला काम खोज्न सहर बजारतिर धाउनुपर्ने बाध्यता रहेकोमा आजभोलि गाउँमै सञ्चालन भएका विकास आयोजनामा काम गर्न भ्याइनभ्याइ भएको बेनी नगरपालिका-२ बगरफाँटका विदुर किसानले बताए ।

कोरोना महामारीका कारण रोजगारी गुमाएर गाउँ फर्किएका युवाले योजनाको जिम्मा लिएर काम गर्न थालेपछि कामको गुणस्तरसमेत राम्रो भएको र समयमा नै योजना सम्पन्न भएका बेनी नगरपालिका-२ का वडाअध्यक्ष हीराबहादुर थापाले बताए ।