वेबटिभी खबर
काठमाडौं । जुम्लाका पर्यटकीय तथा धार्मिक महत्व बोकेका मष्टोहरूमा मेला सुरु भएको छ । कोरोना महामारीका कारण रोकिएका मेला यसपटक भने धुमधामसँग हुने भएको छ ।
चन्दननाथ नगरपालिका-४ का देवीप्रसाद सिम्खाडाका अनुसार जनैपूर्णिमाको अघिल्लो दिन मालिका चौद्धशीमा मालिका माईको पूजा गरि त्यही दिनदेखि सबै ठाउँका देवी देवताहरूको पूजाआजा सुरु हुने चलन छ ।
चन्दननाथ भैरवनाथ गुठी संस्थान जुम्लाका अध्यक्ष पूर्णसिंह कठायतका अनुसार मष्टोसहितका देवताको पूजाआजा सुरु भएको हो ।
यस क्षेत्रमा बाह्र भाई मष्टो, बाबिरा, महादेव, भैरवनाथ, कैलाश, कालिका, मालिका, कालासिल्ला, ह्रयांग्रे लाखुडो, राहदेव, झ्यादेव, दुर्गा भवानीसहितका दर्जनौं देउताको पूजाआजा हुन्छ ।
मनोकामना पूरा गर्ने, सोचेको पुग्ने भएका कारण यहाँका देवी देवता र मष्टोहरूमा भाकल गर्न आउनेहरूको घुँइचो लाग्छ । मेलाका क्रममा यहाँका मन्दिर तथा थानमा पूजा गर्ने, नयाँ ध्वजापतका लगाउने गरिन्छ ।
हिमा गाउँपालिका-१ का कालासिल्लाका पुजारी वीरबहादुर शाहीले पूजाआजा अब कार्तिक पूर्णिमासम्म चल्ने बताए । जुम्ला मष्टो परम्परासहित विभिन्न धार्मिक सभ्यताको केन्द्र पनि हो ।
Copyright © All right reserved to webtvkhabar.com Site By: SobizTrend Technology
