वेबटिभी खबर
पर्सा । पर्साका दुई पालिकाले आर्थिक वर्ष २०७९/८० को नीति तथा कार्यक्रम सार्वजनिक गरेका छन् ।
आव २०७९/८० बजेट गत असार १० गते नै प्रस्तुत गरी सार्वजनिक गर्नुपर्ने भए पनि पर्साको बहुदरमाई नगरपालिका र कालिकामाई गाउँपालिकाले बल्ल बजेट सार्वजनिक गरेका हुन् ।
लामो समयदेखि जनप्रतिनिधिबीच बजेट बाँडफाँटमा विवाद देखिएपछि दुवै पालिकाको बजेट सार्वजनिक हुन सकेको थिएन । बहुदरमाई नगरपालिकाले ६७ करोड ७९ लाख ११ हजार बराबरको अनुमानित बजेट प्रस्तुत गरेको छ ।
संघीय सरकारको समानीकरण अनुदानतर्फ १३ करोड ८२ लाख, ससर्त अनुदानतर्फ २१ करोड तीन लाख, प्रत्यक्ष अनुदानतर्फ १ करोड तथा राजश्व बाँडफाँटतर्फ ९ करोड ३१ लख ४९ हजार रहेको छ ।
नगरपालिकाको नीति तथा कार्यक्रम र बजेटमा समग्रमा विभिन्न विकास निमार्णका कार्यका साथै शिक्षालाई बढी प्राथमिकता दिएर बजेट सार्वजनिक गरिएको नगरपालिकाका प्रमुख प्रशासकीय अधिकृत विदुरप्रसाद उप्रेतीले जानकारी दिए ।
यसैगरी कालिकामाई गाउँपालिकाको आठौं गाउँ सभामार्फत ४२ करोड ६६ लाख बराबरको नीति तथा कार्यक्रम सार्वजनिक गरेको छ । गाउँसभाले आर्थिक वर्ष २०७९/८० का लागि नीति, कार्यक्रम तथा बजेट बहुमतले पारित गरेको हो ।
सभामा आर्थिक विधेयक, विनियोजन विधेयकसहित गाउँपालिकाको आवश्यक ऐन सम्बन्धित विधेयक पारित भएको गाउँपालिकाले जनाएको छ ।
Copyright © All right reserved to webtvkhabar.com Site By: Sobij
