नयाँ दिल्ली । हार्टअट्याकबाट निधन भएका भारतका चर्चित कमेडियन राजु श्रीवास्तवको बिहीबार दिल्लीको निगमबोध घाटमा अन्तिम दाहासंस्कार गरिएको छ ।
हार्टअट्याकको उपचारमा करिब डेढ महिना भेन्टिलेटरमा राखेर उपचार भइरहेकै बेला बुधबार उनको निधन भएको थियो । उनको शवयात्रा दिल्लीको दशरथपुरबाट सुरु भएको थियो । शवयात्रामा ठूला संख्यामा उनका समर्थक सहभागी थिए ।
भारतीय जनता पार्टीसँग निकट राजु राजनीतिक भेटघाटका लागि दिल्ली आएका बेला जिम हाउसमा कसरत गर्ने क्रममा एक्कासी बिरामी परेका थिए ।
उनलाई दिल्लीको एम्स अस्पतालमा भर्ना गरेर उपचार गरिएको थियो । उपचारकै बीचमा उनले हातखुट्टा चलाएको र स्वास्थ्यमा सुधार भएका समाचारहरू पनि आएका थिए । तर उनी उपचारबाट निको हुन सकेनन् । बुधबार उनको अवस्था लगातार बिग्रँदै गएर निधन हुनु पुग्यो ।
उनको शवयात्रामा नेता तथा सेलिब्रेटीहरू सहभागी भएका थिए ।
Copyright © All right reserved to webtvkhabar.com Site By: SobizTrend Technology