वेबटिभी खबर
काठमाडौं । काठमाडौं उपत्यकामा कोरोना संक्रमितको संख्या दिनहुँ बढेपछि कालीमाटी फलफूल तथा तरकारी बजार विकास समितिले बजार परिसरमा स्वास्थ्य मापदण्डमा कडाइ गरेको छ ।
कालीमाटी तरकारी बजारक्षेत्रमा मंगलबारदेखि लागु हुने गरी समितिले नयाँ मापदण्ड लागु गरेको हो । समितिले मंगलबार सूचना जारी गर्दै खुद्रा बजार र थोक बजारमा हुने सबै खुद्रा कारोबार क्रमशः वैशाख ३० र २९ गतेदेखि बन्द गर्न लागेको बताएको छ ।
समितिले लागु गरेको नयाँ मापदण्डअनुसार थोक बजारमा प्याकेजिङ गरेर मात्रै बिक्री वितरण गर्नुपर्नेछ । एउटा थोक पसलमा अधिकतम २ जना मात्र बसी सामाजिक दूरी कायम गर्दै सबै स्वास्थ्य सुरक्षा मापदण्ड अपनाएर मात्र कारोबार गर्न निर्देशन दिइएको छ।
बजार परिसरभित्र मोटरसाइकल, साइकल तथा ठेला प्रवेशमा पूर्ण बन्देज लगाइएको समितिले जनाएको छ । ठूला कृषकहरुले स्वास्थ्य सुरक्षा मापदण्ड अपनाएर अक्सन यार्ड/होल्डिङ यार्डमा अक्सन कारोबार गर्न सक्नेछन् ।
Copyright © All right reserved to webtvkhabar.com Site By: Sobij
