वेबटिभी खबर
कायरो । इजिप्टले स्वेज नहरको दक्षिणी भागलाई अझ फराकिलो र गहिरो बनाउने योजना अगाडि सारेको छ । गत मार्चमा यस नहरमा एउटा विशाल कार्गो पानीजहाज नहरमा तेर्सिएपछि केही दिन यस नहरबाट हुने जहाजको ओहोरदोहोर रोकिएको थियो ।
स्वेज नहर प्राधिकरणका प्रमुख लेफ्टिनेन्ट जनरल ओसामा राबीले इस्मालिया सहरमा आयोजित समारोहमा सम्बोधन गर्दै योजनाको विस्तृत विवरण प्रस्तुत गरेका छन् । इजिप्टका राष्ट्रपति अब्देल–फताह अल–सिसी र सरकारका उच्च पदाधिकारी उक्त समारोहमा सहभागी भएका थिए ।
जनरल राबीका अनुसार नहरको दक्षिणतर्फ करिब ४० मिटर फराकिलो बनाइने छ । यस क्षेत्रलाई हाल ६६ फिट गहिराईलाई बढाएर ७२ फिट बनाइने छ । त्यस क्षेत्रमा नहरको कूल लम्बाई ३० किलोमिटर रहेको छ ।
साथै प्रस्तावित योजनामा सन् २०१५ मा खुला गरिएको नहरको दोस्रो लेनको विस्तार पनि रहेको छ । यसबाट बढीभन्दा बढी जहाजहरु ओहोरदोहोर गर्न सक्नेछन् ।
गत मार्च २३ मा नहरमा अड्किएको एभर गिभेन नामको कार्गो पानीजहाज यही एकल लेनमा फसेको थियो । यस पानीजहाजलाई अझै पनि स्वेज क्यानल अथोरिटी र जहाज धनीबीच आर्थिक विषयमा उत्पन्न विवादका कारण ग्रेट बिटर लेकमै राखिएको छ ।
विश्व व्यापारको करिब १० प्रतिशत सामान यही नहर हुँदै ओहोरदोहोर गर्ने गर्दछ । यो नहर इजिप्टका लागि एउटा प्रमुख वैदेशिक मुद्रा आर्जनको स्रोत बनेको छ । सरकारी विवरण अनुसार गत वर्ष सन् २०२० मा यस नहरहुँदै करिब १९ हजार जहाज ओहोरदोहोर गरेका थिए ।
स्वेज नहरमा फसेको जहाज सतहमा निकालियो 
इजिप्टको स्वेज नहरमा विशाल पानीजहाज फसेपछि जलमार्गमा जाम
Copyright © All right reserved to webtvkhabar.com Site By: SobizTrend Technology
