सर्लाही । मंसिर ४ गते भएको प्रतिनिधिसभा र प्रदेशसभा निर्वाचनमा आफ्नो पार्टीका उम्मेदवारलाई अन्तर्घात गरेर हराएको भन्दै नेकपा माओवादी केन्द्रका दुईजना पोलिटब्युरो सदस्यलाई कारबाही गर्न सर्लाहीका चार वटा स्थानीय तहले केन्द्रमा सिफरिस गरेको छ ।

पार्टीका पोलिटब्युरो सदस्यद्वय रामेश्वर राय र अच्युतम काफ्लेले सर्लाहीमा आफ्नो पार्टीको उम्मेदवरालाई पराजित गराउन अर्काे पार्टीको उम्मेदवारसँग मिलेमतो गरेको आरोप लगाइएको हो ।

दुबै नेता सर्लाहीकै हुन् । रामेश्वर राय २०७४ सालको चुनावमा सर्लाही ३ बाट प्रतिनिधिसभा सदस्यमा जितेका नेता हुन् । काफ्ले सर्लाही जिल्ला इन्चार्जको जिम्मेवारीमा समेत छन् ।

सर्लाहीको हरिवन, बागमती, बरहथवा र कविलासी नगर कमिटीले छुट्टा छुट्टै पत्र लेखेर दुबै जना नेतालाई कारबाही गर्न माग गरेका छन् ।

नगर कमिटीको बैठक राखेर दुबै नेताले अन्तर्घात गरेको भन्दै कारबाही गर्न मधेस प्रदेश कमिटी र केन्द्रलाई पत्र पठाएको हो ।

राय माओवादी केन्द्रबाट प्रतिनिधिसभा सदस्यका लागि समानुपातिक सूचीमा पनि छन् । रायले खुलेआम पार्टीका उम्मेदवारलाई हराउन भूमिका खेलेकाले उनलाई कारबाही हुने निश्चित भएको एक नेताले बताए ।

'रायले पार्टी उम्मेदवारलाई हराउन एमालेसँग मिलेर खुलेआम गतिविधि गरेको प्रमाणसहित पार्टी नेतृत्वको जानकारीमा छ,' ती नेताले भने, 'मधेसी कोटाबाट समानुपातिक सूचीमा परे पनि उनलाई पार्टीले कारबाही गर्ने र कुनै हालतमा समानुपातिकबाट सांसद नबनाउने निश्चत भइसकेको छ । यस्ता अन्तर्घाती रहुन्जेल पार्टी कहिल्यै माथि उठ्न सक्दैन । नेताको नाममा अन्तर्घाती कलंकलाई हामी स्वीकार्न सक्दैनौं ।'   

राय र काफ्लेले माओवादी केन्द्रको भागमा परेको सर्लाही ३ का उम्मेदवार नरेन्द्र साहलाई अन्तर्घात गरेर पराजित गराउन भूमिका खेलको पार्टीले निष्कर्ष निकालेको हो ।

गठबन्धनबाट उम्मेदवार बनेका साहको जित सुनिश्चित मानिएको थियो । तर, पार्टी नेताकै अन्तर्घातका कारण झिनो मतले साह पराजित भएका थिए ।

साहलाई जित्न नदिन रायले निर्वाचनअघि एमालेका नेताहरूसँग गोप्य बैठकहरू गरेका थिए । उनले पार्टीलाई अन्तर्घात गर्दै एमाले नेतासँग गोप्य बैठक गरेको फोटोसमेत सार्वजनिक भएको छ ।

एमाले नेतासँग रातारात गरेको गोप्य बैठकको फोटोसहित रायलाई कारबाही गर्न केन्द्रमा पत्राचार गरिएको एक नेताले बताए ।

निर्वाचनमा माओवादी केन्द्रका उम्मेदवार साह एमालेका नेता हरि उप्रेतीसँग हारेका थिए । उप्रेतीले ३२ हजार ९३८ मत प्राप्त गर्दा कलवारले ३२ हजार १६८ मत ल्याएका थिए ।