गाजा सिटी । इजरायल र प्यालेस्टिनी कट्टरपन्थी हमासबीच ११ दिनको युद्धपछि आपसी सहमतिमा युद्धविराम भएको छ । यस अवधिमा २४० जनाभन्दा धेरै मानिसले ज्यान गुमाएका छन् । केही घण्टा अघि इजरायली मन्त्रिपरिषद्ले आपसी सहमति र विना शर्त युद्धविरामको निर्णयलाई अनुमोदन गरेको हो ।

हमासका एक अधिकारीले मेलमिलाप र आपसी सहमतिमा भएको युद्धविराम शुक्रबारको बिहान इजरायली समयअनुसार २ बजेबाट लागू गरिएको भएको अल जजिराले जनाएकाे छ ।

युद्धविरामपछि गाजा र प्यालेस्टाइन क्षेत्रका हजारौं व्यक्तिहरू सबेरै सडकमा निस्किएर झण्डा फहराएर उत्सव मनाएका छन् । 

अमेरिकी राष्ट्रपति जो बाइडेनले इजरायली प्रधानमन्त्री बेन्जामिन नेतान्याहूले युद्धविराम लागू हुने समयको पुष्टि गरेको बताएका छन् । उनले भने, 'युद्धविरामले दुवै पक्षलाई प्रगतिको वास्तविक अवसर दिएको छ ।'

बिहीबार पनि बिहानैदेखि दुवै पक्षबीच विभिन्न स्थानमा भीषण हमला भइरहेको थियो । आक्रमणबाट कम्तीमा एक जना प्यालेस्टिनी नागरिकको मृत्यु हुनुका साथै अन्य धेरै जना घाइते भएका थिए । 

इजरायलको राजनीतिक सुरक्षा मन्त्रालयले युद्धविराम प्रस्तावलाई सर्वसम्मतिले स्वीकार गरेको छ । इजरायलका रक्षामन्त्री बेनी गान्ट्जले ट्वीटरमा भनेका छन् 'गाजा अभियानबाट इजरायललाई अभूतपूर्व सैनिक फाइदा पुगेको छ ।'

हमासका एक अधिकारीले समाचारएजेन्सी एएफपीसँग इजरायलको युद्धविरामको घोषणा प्यालेस्टिनी जनताको जीत र प्रधानमन्त्री बेन्जामिन नेतान्याहूको हार भएको प्रतिक्रिया दिएका छन् । 

हमास नेता अली बराकेहले मध्यस्थहरूले युद्धविरामलाई अन्तिम रुप नदिएसम्म हमास सतर्क रहने बताएका छन् । युद्धविरामको घोषणा भएको केही मिनेटमै इजरायली सेनाले दक्षिणी इजरायलमा चेतावनीको साइरन बजेको बताएको छ । गाजाबाट रकेट आक्रमण भएको अवस्थामा मात्र त्यहाँ साइरन बज्छ । 

अर्कोतर्फ, प्यालेस्टिनी मिडियाले गाजा क्षेत्रमा शुक्रबार फेरि हवाई हमला भएको जनाएका छन् । 

अमेरिकी राष्ट्रपति जो बाइडेनले युद्धविरामपछि नेतान्याहूलाई फोन गरेर हमासलगायत अन्य चरमपन्थीको रकेट हमलाबाट इजरायलको रक्षा गर्ने अधिकारलाई अमेरिकाले समर्थन गर्ने बताएका छन् । बाइडेनले द्वन्द्वले जनतामा परेको असर उल्लेख गर्दै युद्धविरामका लागि इजिप्टका राष्ट्रपति अल सिसीले गरेको प्रयासको पनि प्रशंसा गरे । 

उनले गाजामा संयुक्त राष्ट्र संघसँग मिलेर मानवीय सहायता पुर्याउनका लागि काम गर्ने प्रतिबद्धता व्यक्त गरेका छन् । 

अमेरिकी राष्ट्रपति जो बाइडेनले कारबाही रोक्न इजरायली प्रधानमन्त्री नेतान्याहूलाई पटकपटक आग्रह गरेका थिए ।

इजरायल र हमासबीचको पछिल्लो युद्ध गत मे १० तारिखदेखि सुरु भएको हो । पूर्वी जेरुसेलमस्थित अल अक्सा मस्जिद परिसरमा प्यालेस्टिनी प्रदर्शनकारी र इजरायली प्रहरीबीच निकै दिनदेखि जारी भिडन्तपश्चात हमास लडाकूले जेरुसेलमलाई लक्षित गरी लामो दूरीका क्षेप्यास्त्र प्रहार गरेपछि इजरायलले हमासविरुद्ध कारबाही थालेको थियो । 

अल अक्सा मस्जिद परिसरमा प्रहरीको दमनका साथै यहूदीहरुले दर्जनौं प्यालेस्टिनी परिवारलाई विस्थापित गर्न खोजेपछि परिस्थिति अझ जटिल बनेको थियो । 

त्यसयता, इजरायलले सयौं हवाई हमला गरिसकेको छ । इजरायलको भनाईमा यी आक्रमणहरु हमासका सबै किसिमका पूर्वाधार ध्वस्त बनाउन केन्द्रित थियाे । हमासले पनि चार हजारभन्दा बढी क्षेप्यास्त्रहरु इजरायलतर्फ प्रहार गरेको जनाएको छ ।  

गाजाको स्वास्थ्य मन्त्रालयका अनुसार इजरायली आक्रमणबाट कम्तीमा २ सय २७ जनाको मृत्यु भएको छ जसमा ६४ जना बालबालिका र ३८ जना महिला छन् । आक्रमणबाट एक हजार ६ सय २० जनाभन्दा बढी घाइते भएका छन् ।

हमास र इस्लामिक जिहादले आफ्ना कम्तीमा २० जना लडाकू मारिएको जनाएका छन् तर इजरायलले एक सय ३० जना हमास लडाकू मारिएको दाबी गरेको छ । 

इजरायली आक्रमणको त्रासका कारण झण्डै ५८ हजार प्यालेस्टिनी विस्थापित भएका छन् । इजरायलतर्फ पाँच वर्षका एक बालकसहित १२ जनाको मृत्यु भएको छ । 

इजरायली आक्रमणबाट गाजामा कम्तीमा १८ वटा अस्पताल र क्लिनिकमा क्षति पुगेको छ भने एउटा स्वास्थ्य संस्था क्षतिग्रस्त भएको विश्व स्वास्थ्य संगठनले जनाएको छ । सन् २०१४ यताको सबैभन्दा डरलाग्दो हमला मानिएको यस पटकको युद्धलाई लिएर विश्वका विभिन्न स्थानमा इजरायलविरुद्ध प्रदर्शनहरु भएका थिए । 

इजरायल युद्धः बमले पूर्वाधार ध्वस्त, गाजामा औषधि, खानेपानी, बिजुली छैन् इजरायलमा युद्धविराम रोक्न बाइडेनको अपील, युएनमा अमेरिकाको अवरोध कायमै