वेबटिभी खबर
काठमाडाैं । भ्रष्टाचार मुद्दामा दोषी ठहर भएका सडक विभागका पूर्वमहानिर्देशक आनन्दप्रसाद खनालको भक्तपुरस्थित ६५ आना जग्गा सरकारले जफत गरेको छ । सर्वाेच्च अदालतले फैसला गरेको १० वर्षपछि उनको जग्गालगायत स्रोत नखुलेको सम्पत्ति जफत प्रक्रिया अघि बढेको हो । उनीमाथि अवैध सम्पत्ति आर्जनसम्बन्धी भ्रष्टाचार मुद्दा दायर भएकाे थियाे।
गृह मन्त्रालयअन्तर्गतको कसुरजन्य सम्पत्ति व्यवस्थापन विभागले गत साता भक्तपुरको कटुन्जेस्थित खनालको जग्गा आफ्नो नाममा ल्याएको हो । जग्गाको हालको बजारमूल्य करिब १६ करोड रुपैयाँ छ । जफत भएको जग्गामा विभागले कसुरजन्य सम्पत्ति राख्न स्टोर बनाउने तयारी गरेको छ ।
सर्वाेच्च अदालतले १२ भदौ ०६९ मा खनाललाई दोषी ठहर गरी एक वर्ष तीन महिना कैद, एक करोड २१ लाख ५२ हजार ४४ रुपैयाँ जरिवाना र स्रोत नखुलेको उनको सम्पत्ति जफत गर्ने फैसला गरेको थियो ।
सर्वोच्चले खनालका छोराको नाममा काभ्रेको श्रीखण्डपुरमा रहेको जग्गा पनि जफत हुने फैसला गरेको थियो जुन अहिलेसम्म कार्यान्वयन हुन सकेको छैन । छोरीछोरीको नाममा टाउन डेभलपर्स कम्पनीको नाममा ५१ हजार कित्ता सेयरबराबरको रकम भने नेपाल सरकारको राजस्व खातामा जम्मा भइसकेको छ । त्यस्तै, १२ वटा बैंक खातामा रहेको १८ लाख ९६ हजार नगद पनि जफतको फैसला भएको थियो । सो रकम जफत भए–नभएको विषयमा विभागले जिल्ला अदालत काठमाडौैंलाई पत्राचार गरेको छ । नयाँ पत्रिका दैनिकबाट
Copyright © All right reserved to webtvkhabar.com Site By: Sobij
