सर्लाही । सर्लाहीका माझी समुदायले मंगलबार कोशी अर्थात् लदीपूजा धुमधामसँग मनाएका छन् ।
पानीभन्दा अगाडि जन्म भएको किम्वदन्तीमा विश्वास राख्ने माझी समुदायको पुख्र्यौली थलो कोशी किनारहरू हो । विशेष गरी पानीको पूजा गर्ने भएकाले पनि यो समुदायले कोशी पूजालाई ठूलो पर्वको रूपमा लिने गर्दछन् । लदीपूजा माझी समुदायको मुख्य चाड हो । माझी समुदायले लदीपूजालाई प्रकृति पूजाको रूपमा लिने गर्छन् ।
लदीपूजाका अवसरमा एक कार्यक्रम आयोजना गरी संविधानसभाका सभासद नरेन्द्र साहलाई प्रमुख अतिथि बनाइएको थियो । साहले पनि बाग्मतीस्थित निर्माणाधीन माछा पोखरी (भरत ताल) मा डुंगा खियाए ।
जिल्लाभरका माझी समुदाय भरत तालमा भेला भएर ऐतिहासिक पर्व लदीपूजा मनाएका हुन् । गत वर्षदेखि यहाँका माझी समुदाय संगठित भएर लदीपूजा पर्व मनाउँदै आएका छन् ।
माझी समुदायलाई नदी, तालमा डुंगा खियाउने जातिका रूपमा चिनिन्छ तर पछिल्लो समय उनीहरूले अन्य पेशा व्यवसाय पनि अंगालेका छन् ।
कार्यक्रममा माझी समुदायका पुरुष तथा महिलाहरू माझी समुदायको पोसाकमा सजिएका थिए ।
Copyright © All right reserved to webtvkhabar.com Site By: SobizTrend Technology