वेबटिभी खबर
कञ्चनपुर । जिल्ला स्वास्थ्य कार्यालय कञ्चनपुरले मलेरियाको उच्च जोखिम क्षेत्रमा विषादी छर्किने अभियान सुरु गरेको छ ।
सोमबारदेखि जिल्लाका उच्च जोखिम भएका क्षेत्रमा विषादी छर्किन लागेको स्वास्थ्य कार्यालयका औलो निरीक्षक सिद्धराज भट्टले जानकारी दिए । जिल्लामा मलेरीयाको उच्च जोखिम रहेको क्षेत्र भीमदत्त नगरपालिका-१ र कृष्णपुर नगरपालिका-५ मा विषादी छर्किन लागिएको हो ।
‘मध्यम जोखिम भएका क्षेत्रका झुल वितरण गरेका छौँ’, भट्टले भने, ‘सरकारको योजनाअनुसार २०२५ सम्ममा जिल्लालाई मलेरिया शून्यमा झार्ने लक्ष्यले काम भइरहेको छ ।’ त्यसैगरी भीमदत्तका वडा नं-९, १० र बेदकोट नगरपालिकाका वडा नं-१, २ र ६ का सबै नागरिकलाई झुल वितरण गरिएको छ ।
कञ्चनपुरमा चालु आर्थिक वर्षमा २१ मलेरियाका बिरामी फेला परेका छन । तीमध्ये १६ बाहिरबाट आएका व्यक्तिमा संक्रमण देखिएको भट्टले बताए । त्यसमध्ये छ जनामा कडा खाले मलेरिया देखिएको छ भने अन्य १४ मा कम कडा भएको मलेरिया देखिएको निरीक्षक भट्टले जानकारी दिए ।
‘जिल्लामा भारत तथा अन्य ठाउँबाट आउनेमा बढीजसो मलेरिया देखिने गरेको छ’, भट्टले भने, ‘पछिल्ला वर्षको तथ्यांक हेर्दा जिल्लामा बिरामीको संख्या घट्दै गएको छ ।‘ कञ्चनपुरमा हाल प्लाज्मोडियम विबक्स र प्लाज्मोडियम फाल्सिपेरम जातका बिरामी देखा परेका जनाइएको छ ।
Copyright © All right reserved to webtvkhabar.com Site By: SobizTrend Technology
