Logo

२०७८, श्रावण ११ गते सोमवार

२०७८, श्रावण ११ गते सोमवार

सरकारमा जानेसँग लामो यात्रा हुने सम्भावना छैनः महेन्द्र राय यादव (भिडियोसहित)

सरकारमा जानेसँग लामो यात्रा हुने सम्भावना छैनः महेन्द्र राय यादव (भिडियोसहित)

  • 1.0K
    SHARES
  • सरकारमा जानेसँग लामो यात्रा हुने सम्भावना छैनः महेन्द्र राय यादव (भिडियोसहित)

    जनता समाजावादी पार्टी, नेपाल (जसपा) सरकार र विपक्षी गठबन्धन दुईतिर बाँडिएको छ । एउटै दल सत्तापक्ष र विपक्षमा विभाजन भएको अनाैठाे अवस्था छ । वास्तवमा जसपा सत्तारुढ हो कि प्रतिपक्ष हो ? के पार्टी विभाजन उन्मुख भएको हो ? यो प्रश्न अहिले आम जनताको चासोको विषय बनेको छ । यसै सन्दर्भमा जसपाका शीर्ष नेता एवं पूर्वमन्त्री महेन्द्र राय यादवसँग वेबटिभी खबरले गरेको कुराकानीको सम्पादित अंशः 

    जसपा सत्तारुढ दल हो कि विपक्षी ?

    जसपा विपक्षी दल हो । प्रधानमन्त्री केपी शर्मा ओलीले पहिलो पटक पुष ५ गते संसद विघटन भएपछि नै हाम्रो पार्टीको केन्द्रीय बैठकले त्यसलाई प्रतिगमन भनेको हो । अहिले पनि हामी त्यो एजेन्डमा यथावत छौं । कुनै पनि पार्टीको निर्णय मात्र आधिकारीक हुन्छ । हाम्रो पार्टी सरकारमा गएको छैन् । उहाँहरु (महन्थ ठाकुर र राजेन्द्र महतो पक्ष) व्यक्तिगत रुपमा सत्तामा जानु भएको हो । व्यक्तिगत स्वार्थका लागि सरकारमा जानु भएको हो । सरकारमा जानेहरुलाई हामीले साधारण सदस्यताबाट हटाइसकेका छौं । जो सरकारमा सहभागी हुनुहुन्छ उहाँहरु स्वतः साधारण सदस्यताबाट खारेज हुनुहुन्छ ।

    एउटै पार्टीको एउटा हिस्सा ओली नेतृत्वको सरकारमा सहभागी हुने अनि अर्को हिस्सा यो सरकार गिराउन प्रयास गर्ने अवस्था कसरी आयो ? जसपामा खास नमिलेको के हो ?

    ओली नेतृत्वको सरकारले जुन बेला पार्टी फुटाउन सहज बनाउने अध्यादेश ल्यायो । खासगरी त्यसबेला राजपा र समाजवादी पार्टी फुटाउन आएको अध्यादेश थियो । त्यसले गर्दा हतारमा दुई पार्टी रातारात मिले । तर एकता भएकोमा उहाँहरु (सरकारमा जानेहरु) पछुताउनु भएको थियो । ओलीसँग उहाँहरुको लामो संगत देखिन्छ । अहिले प्रकट भएको मात्र हो । आफ्नो स्वार्थ र सत्ता प्राप्तिका लागि उहाँहरुले जनताको आँखामा छारो हाल्नु भएको छ । नितान्त व्यक्तिगत लाभका लागि सत्तामा गएर जनतालाई अधिकारविहिन बनाउने काममा उहाँहरु लाग्नु भयो । पार्टी निर्णयमा आधारमा चल्ने हो । हाम्रो पार्टी सरकारमा गएको छैन् । व्यक्ति गएको मात्र हो । हामीले सरकारमा जानेलाई कारबाही गरिसकेका छौं । जो सरकारमा जान्छन उनीहरु जसपा हैनन ।  

    mahendraraya1.jpg

    जसपाको माग पुरा भएकाले सरकारमा गएको ठाकुर-महतो पक्षको भनाई छ नि ? 

    जतिवेला संविधान संशोधनसहित हाम्रा माग पुरा गर्ने अवस्था थियो । त्यत्तिखेर हाम्रा माग पुरा भएन । नेकपा कायम रहेका बेला सरकारको यही नेतृत्वले हाम्रो माग पुरा नगरेको हो ।  हाम्रा मुद्दा संसदबाटै पुरा हुने हो । जुन ठाउँबाट माग पुरा हुनुपर्ने हो, त्यो संसद विघटन भयो । हामीले त्यसको विरोध गर्यौं । तर, हाम्रै साथीहरु अहिले विघटनको पक्षमा उता मिल्न जानु भयो । 

    केही माग त पुरा भएको छ नि ?

    अहिले काम चलाउ सरकारले दिर्घकालिन असर पार्ने कुनै काम गर्न पाउँदैन । यो कुरा हाम्रो पार्टीबाट जाने साथीहरुलाई पनि थाहा छ । यो कुरा जानी जानी जनताको आँखामा छारो हाल्ने मात्र काम उहाँहरुबाट भइरहेको छ । नागरिकता अध्यादेश सर्वाेच्च अदालतले रोकिदियो । काम चलाउ सरकारले ल्याएको अध्यादेश कार्यान्वयन हुँदैन भन्ने थाहा भएर पनि माग पुरा भयो भन्दै सरकारमा जान केही साथीहरु तयार भए ।

    नेपालमा कुनै पार्टीमा विभाजन आउने अवस्था भयो भने त्यसमा विदेशी शक्तिको चलखेल भन्ने गरिन्छ । अहिले त्यस्तो भएको त हैन ? 

    व्यक्तिगत स्वार्थका लागि पार्टी फुटाउने, आफ्नो स्वार्थका लागि सरकारमा जाने तर विदेशी शक्तिलाई दोष दिने काम यहाँ हुने गरेको छ  । व्यक्तिगत लाभहानी हेरेर निर्णय गर्नेहरु यता उता हुनुमा विदेशीको हात हुँदैन । वैचारिक शुन्यता भएका व्यक्तिहरु, सिद्धान्त बोक्न नसकेका, व्यक्तिगत स्वार्थमात्र हेर्ने साथीहरु उता (सरकारमा) जानु भएको हो ।

    मधेस केन्द्रीत दल एक हुँदा जनता खुशी भएको देखिन्थ्यो । यसरी छोटो अवधिमा विभाजनको अवस्था आउँदा जनतालाई के जवाफ दिनु हुन्छ ? 

    राष्ट्रिय पार्टी हुन चुनावमा तीन प्रतिशत भोट ल्याउनु पर्ने वाध्यात्मक अवस्था भएपछि हामी ६ वटा पार्टी मिलेर राष्ट्रिय जनता पार्टी (राजपा) गठन गरेका थियौं । त्यो पार्टी बन्दा मधेसका जनता निकै खुशी थिए । त्यसकारण भोट पनि राम्रो पायौं ।

    त्यही बेलादेखि नै समाजवादीसँग एकताको लागि मैले प्रयास गरेको हुँ । तर हाम्रा साथीहरु ओलीसँगै मिल्नेमा प्रयासरत हुनुहुन्थ्यो । प्रदेश २ बाट सदस्य चुन्नका लागि भएको राष्ट्यि सभाको चुनावमा पनि साथीहरु ओलीसँगै मिल्नु भयो । पहिलेदेखि नै उता नजिक हुनुहुने साथीहरु अहिले सरकारमा जानु भएको मात्र हो ।

    जसपा गठन भनेको ठूलो खाले एकता थियो । मधेसदेखि पहाडसम्म हाम्रो संगठन बढेको थियो । तर उहाँहरुले बाटो विराउनु भयो । पार्टीको विधि प्रक्रिया मिचेर सरकारमा जानु भयो । यो अराजकता र अनुशासनहिनता हो । सरकारमा जानु वहाँहरुको व्यक्तिगत अकांक्षामात्र हो । मुद्दाविहिन अवस्थामा उहाँहरु सरकारमा जानु भएको हो ।

    mahendraraya2.jpg

    यो अवस्थामा जसपा एक रहने संभावना अझै छ ?

    पार्टी नफुटोसभन्ने हाम्रो चाहना हो । पार्टी फुट्नु हाम्रा मतदाताको चाहनाविपरित हो । यसको केही न केही नकारात्मक असर त पर्छ नै । उहाँहरूको क्रियाकलाप के हुन्छ । त्यसपछि कुरा हुन्छ । कुरा प्रष्ट भएपछि पार्टीभित्र छलफल हुने वातावरण बन्छ ।  उहाँहरू सरकारमा गएपछि पार्टीले उहाँहरूलाई कारबाही गरेको छ । उहाँहरूसँग लामो यात्रा हुने सम्भावना मैले देखेको छैन । पार्टीमा बस्ने हो कि होइन, उहाँहरूले नै तय गर्ने हो । जसपा सरकारमा गएको होइन, उहाँहरूले नैतिक रूपमा जसपाका नेता हौं भन्न पनि मिल्दैन ।

    उहाँहरू पार्टीको निर्णय विपरीत सरकारमा जानु भएको छ । जुन सरकारले हाम्रो माग पुरा गरेन त्यही सरकारमा उहाँहरू सहभागी हुनुभएको छ । केही व्यक्तिहरू सरकारमा जाँदैमा मुक्तिको आन्दोलन विचलित हुँदैन । १३ महिनासम्म एकताका बाँकी काम गर्न उहाँहरूले नै रोक्नु भयो ।  एकता हुन नसक्दा हिमाल, पहाड, मधेस, तराईमा जुन ढंगले हामी जाने भन्ने थियो, त्यसमा केही प्रभाव परेको छ । एक वर्षदेखि त कोरोनाले पनि यसमा असर गरेको छ । 

    mahendraraya.jpg

    कोही सरकारमा कोही विपक्षमा हुँदा आम जनतामा सरकारात्मक सन्देश जाला त ?

    केही साथीहरु सरकारमा जाँदा मनोवैज्ञानिक रूपमा जसपालाई असर पुग्ला कि जस्तो लाग्ला, तर त्यस्तो हुँदैन । यो सरकारसँग उहाँहरू प्रतिनिधिसभाको चुनावकै बेलादेखि जोडिन खोज्नु भएको हो ।एमालेकै मतदाताले उहाँ (राजेन्द्र महतो) लाई जिताउनु भएको हो । राष्ट्रियसभामा घाँटी जोडियो, सत्ता लोलुपताकै कारण अहिले सरकारमा जानु भयो । सत्तामै जानका लागि उहाँहरूले जसपा एकता गर्न नचाहनु भएको हो । जनताले यो कुरा बुझेका छन् । 

    जसपामा अहिले कस्को पक्षमा बहुमत छ ? 

    ७ सय ८१ जना हाम्रो केन्द्रीय कमिटीमा हुनुहुन्छ । ४ सय समाजवादीको तर्फबाट र ३ सय ८१ राजपाबाट छन् । ५१ जनाको कार्यकारिणीमा ३१ जना हामीसँग छ, बाँकी उहाँहरूसँग छ । संसदमा १६/१६ हो दुवैपक्षको, जसमा थप ५ जना उहाँहरूले लानु भएको छ ।  कार्यकारिणी र केन्द्रीय समितिमा हामी बहुमतमा छौं । अहिले संसदमा उहाँहरु बहुमतजस्तो देखिनु भएको छ । तर, मन्त्री बनेका त सरकारमा रहनुहोला तर जो मन्त्री बन्नु भएको छैन उहाँहरु हामीसँग हुनुहुन्छ । 

    संसद पुनर्स्थापना भएपछि उहाँहरु हामीसँग आउनुहुन्छ । मन्त्री नबनेका सांसदहरु हाम्रो सम्पर्कमा हुनुहुन्छ । यो पाटी नै आधिकारिक भएकाले सबै आउनुहुन्छ । केही सांसदहरू मन्त्रीमा नाम लेखाउने हतारले जानु भयो । सिद्धान्त बोकेको पार्टी हाम्रो हो ।  पहिले वेदानन्दले पनि मधेसी जनतालाई धोका दिए । अहिले पनि केही बेदानन्दहरू बाँकी रहेछन् भन्ने देखिन्छ, तर त्यस्ता बेदानन्दहरू आफैं सकिन्छन्, जनताले साथ दिँदैनन् । 

    हेर्नुहोस् भिडियो 

    सम्बन्धित समाचार
    धेरै पढिएको

    Copyright © All right reserved to webtvkhabar.com Site By: SobizTrend Technology