वेबटिभी खबर
मनाङ । मनाङलाई पूर्ण खोप सुनिश्चित जिल्ला घोषणा गरिएको छ । यहाँका सबै स्थानीय तहलाई पूर्ण खोप सुनिश्चित घोषणा गरिएपछि जिल्लालाई नै पूर्ण खोप सुनिश्चित जिल्ला घोषणा गरिएको हो ।
स्वास्थ्य कार्यालयले आज आयोजना गरेको कार्यक्रममा जिल्ला समन्वय उपप्रमुख सुरेन्द्र गुरुङले मनाङलाई पूर्ण खोप सुनिश्चित घोषणा गरेका हुन । प्रत्येक घरघरमा पुगेर पूर्ण खोप लगाएको तथ्यांक संकलनपश्चात् जिल्लालाई पूर्ण खोप सुनिश्चित जिल्ला घोषणा गरिएको स्वास्थ्य कार्यालयका प्रमुख बाबुराम आचार्यले जानकारी दिए ।
उनका अनुसार जिल्लाका आठ हजार आठ सय २१ जनाको तथ्यांक संकलन गरिएको थियो । संकलित तथ्यांकमध्ये पाँच हजार नौजना जिल्लामा नै बसोबास गर्दै आएका छन् भने दुई सय ६३ जना वैदेशिक रोजगारीमा गएको पाइएको छ ।
स्थानीय तहअनुसार चामे गाउँपालिकामा नौ सय ६३, नार्पाभूमि गाउँपालिकामा पाँच सय ८९, नासों गाउँपालिकामा दुई हजार एक सय आठ र मनाङ ङिस्याङ गाउँपालिकामा एक हजार तीन सय ४९ गरी पाँच हजार नौजनाले पूर्ण खोप लगाएको पाइएको आचार्यले बताए ।
जिल्लाका सबै स्थानीय तहका १६ महिनादेखि ५९ महिनासम्मका सम्पूर्ण बालबालिकालाई राष्ट्रिय खोप कार्यक्रमको तालिकाबमोजिम १५ महिनाभित्र पाउनुपर्ने सबै खोप पाइसकेको सुनिश्चिततासहित मनाङलाई पूर्ण खोप सुनिश्चित जिल्ला घोषणा गरिएको स्वास्थ्य कार्यालयले जनाएको छ ।
Copyright © All right reserved to webtvkhabar.com Site By: Sobij
