काठमाडौं । स्वास्थ्य तथा जनसंख्या मन्त्रालयले बाढी प्रभावित क्षेत्रमा कोरोना महामारीसँगै पानीजन्य र सरसफाइसम्बन्धी रोगहरूको जोखिम हुने भएकाले विशेष सावधानी अपनाउन सर्वसाधारणलाई आग्रह गरेको छ ।
हालै सिन्धुपाल्चोक, म्याग्दी, मनाङलगायतका विभिन्न स्थानमा जनधनको ठूलो क्षति हुने गरी बाढी गएको हुँदा यी क्षेत्रमा बाढीपछि आउने पानीजन्य रोगको जोखिम भएकाले सबैले यो बेला सावधानी अपनाउनु पर्ने मन्त्रालयको भनाइ छ । साथै यी क्षेत्रमा स्वास्थ्य समस्या परेकालाई सहयोग गर्नका लागि स्वास्थ्य मन्त्रालयको टिम नै खटिएको समेत मन्त्रालयले जनाएको छ ।
मन्त्रालयले यस्तो बिषम परिस्थितमा घाइते, संक्रमित तथा प्रभावितहरूको उपचारको लागि आवश्यक सबै प्रबन्ध मिलाउने कार्य गरिरहेको जनाएको छ । मन्त्रालयकाअनुसार बाढी र पहिरो जोखिमसँग सबै कोभिड-१९ संक्रमण, पानीजन्य रोग, लामखुट्टेले हुने रोग, सरसफाई सम्बन्धि जनस्वास्थ्यका समस्याहरू झनै बढ्न सक्ने भएकाले सबैले सजग हुनुपर्ने देखिन्छ ।
उद्धार, राहतका कार्यहरूमा जुट्दा कोभिड-१९ विरुद्धको जनस्वास्थ्यका मापदण्ड अपनाउन, सफा पिउने पानी, लामखुट्टेबाट बच्न झुल, उपयुक्त गाँस र बासको प्रबन्ध, औषधिलगायतका सामानहरूमा ध्यान दिन मन्त्रालयले आग्रह गरेको छ ।
जनस्वास्थ्य सुरक्षाका लागि आवश्यक औषधि, उपकरण, स्वास्थ्यकर्मीको व्यवस्थापनको लागि स्थानीय जिल्ला स्वास्थ्य कार्यलय, प्रदेशका सम्बन्धित निकायमार्फत स्वास्थ्य आपतकालिन केन्द्रहरूले समन्वयको व्यवस्था गरिरहेको जानकारी गराउँदै मन्त्रालयले सबैलाई सुरक्षित रहन अनुरोध गरेको छ ।
Copyright © All right reserved to webtvkhabar.com Site By: SobizTrend Technology