दार्चुला । हिमपातले दार्चुलाकाे व्यासमा स्काई फोन टावरको अधिकांश सामग्रीमा क्षति पुर्याएपछि तिंकर र छाङ्ग्रुमा स्काई टावर सात महिनादेखि अवरुद्ध छ ।
छाङ्ग्रुमा रहेका स्थानीयवासी र सशस्त्र प्रहरीको समय बिताउने कहिलेकाहीँ भायनेटले काम गर्छ । त्यो पनि दुई दिनसम्म बिग्रिएपछि त्यहाँ समस्या भएको छ ।
तिंकरका नागरिकले गत वैशाखमा कुञ्चा सरेयता फोन सम्पर्क गर्न पाएका छैनन् । छाङ्ग्रुमा कहिलेकाहीँ भायनेटले काम गरे पनि तिंकर पूरै सञ्चारविच्छेद छ । तिंकर र छाङ्ग्रुमा स्काई टावर बने पनि फोन लाग्दैन ।
नेपाल, भारत र चीनको सीमा क्षेत्रमा पर्ने व्यास गाउँपालिकाको वडा नं १ छाङ्ग्रु र तिंकरमा फोन प्रभावकारी नहुँदा स्थानीयवासीले मात्र नभई सुरक्षाकर्मीले समेत सास्ती खेप्नुपरेको छ ।
निरन्तर भइरहेको वर्षाका कारण सशस्त्र प्रहरीसँग रहेको दुईवटा ल्याण्डलाइनमा समेत समस्या आउने गरेको छ । 'घाम नलागे फोनले काम गर्दैन', एक सशस्त्र प्रहरीले भने, 'चार्ज गर्न विद्युत् छैन । घाम नलागेका कारण सोलार सिस्टमले काम गरेको छैन । भायनेट दुई दिनसम्म नचलेर निकै सकस भयो ।'
यस ठाउँमा अझै फोन सेवा सञ्चालन अनिश्चित छ । 'नेपाल टेलिकमको स्काई टावर सञ्चालन गर्नका लागि प्राविधिकहरुको टोली तयारी अवस्थामा छन् तर जानलाई बाटोघाटो छैन', टेलिकम दार्चुलाका प्रमुख कृष्णबहादुर गुरुङले भने ।
नेपाल-भारत दुवै ठाउँपट्टि बाटो अवरुद्ध छ । भारतीय बाटो भएर जानलाई पाससमेत बनाइएको छ । त्यहाँ पनि गर्वाधार क्षेत्रमा गत मंगलबार गएको पहिराेका कारण सडक अवरुद्ध छ । नेपालतिर जान सम्भव छैन । कल्जुभन्दा माथिल्लो क्षेत्र पूरै अवरुद्ध छ । चार दिनभन्दा बढी पैदल हिँडेर बर्खाको समयमा जान सकिने अवस्था नरहेको उनको भनाइ छ ।
टेलिकमको टावरमा उपकरण राखेको भवन पूरै क्षतिग्रस्त छ । के-के उपकरण क्षति भयो यकिन छैन । हिमपातले टेलिकमको भवनको छत उडाएपछि भवनभित्र रहेको टेलिकमको बिटिएस, रेडियो सिस्टमलगायतमा क्षति भएको अनुमान गरिएको छ ।
तिंकरमा छाङ्ग्रुको स्काई फोनले समेत काम गर्दैन । यहाँ गएका स्थानीयवासीलाई कुनै समस्या भइहाले पनि आफन्तसँग सम्पर्क गराउन हम्मेहम्मे हुने गरेको छ ।
छाङ्ग्रुमै नमस्ते फोनको टावर जडान गरिएको छ तर नमस्ते फोन सेवा सञ्चालनका लागि सुन्सेराको कैचुलामा रिपिटर टावर राख्नुपर्ने हुन्छ ।
कैचुलामा रिपिटर टावरका लागि भवन निर्माण गरिएको छ । यो क्षेत्रमा टावरको बाँकी काम जडान हुन नसकेको टेलिकम दार्चुलाले जनाएको छ । छाङ्ग्रुमा बन्न लागेको नमस्ते फोनको टावरमा फोरजी सेवासहित सञ्चालन हुनेछ ।
Copyright © All right reserved to webtvkhabar.com Site By: SobizTrend Technology