एजेन्सी
नयाँ दिल्ली । कांग्रेस नेता राहुल गान्धीले प्रारम्भ गरेको ‘भारत जोडो’ अभियानको एक वर्ष पूरा भएको छ । अभियानका क्रममा उनले कन्याकुमारीदेखि काश्मिरसम्म चार हजार किलोमिटर यात्रा गरेको बताएका छन् ।
सामाजिक सञ्जाल एक्समा नेता गान्धीले ‘देशमा एकता र स्नेह प्रवर्धनका साथै समुज्ज्वल भविष्यका निम्ति करोडौँ पाइला’ शीर्षकामा राखेको तीन मिनेटको भिडियोमा भारत एकताबद्ध नभएसम्म र देशबाट घृणा लोप नभएसम्म भारत जोडो यात्रा जारी रहने बताएका छन् । उनले भारत जोडो यात्रालाई निरन्तरता दिने ‘वाचा’ पनि गरेका छन् ।
सामाजिक सञ्जालमा राखिएको भिडियोमा नेता गान्धीका एक सय ३६ दिने यात्राका क्रममा अभिलेख गरिएका पदयात्रा, स्थानीय तहका पार्टीका कार्यकर्ता र सामाजिक संघसंगठनका नेता तथा अभियन्तासँगका भेटवार्ता, आमसभाका दृश्य समावेश गरिएका छन् । अभियानको वार्षिकीका अवसरमा कांग्रेस नेताहरूले देशभर आज विविध कार्यक्रम आयोजना गरेका छन् तर साताव्यापी युरोप भ्रमणमा रहेका गान्धी भने ती कुनै पनि कार्यक्रममा उपस्थित हुने छैनन् । युरोपमा रहँदा उहाँले त्यहाँ रहेका भारतीयसँग छलफल गर्ने कार्यक्रम छ । (फाइल फाेटाे)
Copyright © All right reserved to webtvkhabar.com Site By: Sobij
