मुकेश झा
सर्लाही । तलब नपाएपछि विद्यालय बन्द गरेर धर्नामा बसेका हरिपुर्वा नगरपालिकाका शिक्षकले मंगलबारदेखि पठन पाठन सुरु गरेका छन् ।
नगर प्रमुख विनोद साह र शिक्षा शाखा प्रमुखले प्रमुख प्रशासकीय अधिकृत हाजीर भएलगत्तै तलब दिने आश्वासनमा शिक्षकहरुले धर्ना स्थगित गरेका हुन् । मंसिर ६ गतेदेखि विद्यालय बन्द गरेर नगरपालिका कार्यालयमा धर्ना बसेका शिक्षकले १३ दिनपछि विद्यालयमा पठन पाठन सुरु गरेका हुन ।
केश्वर गरिब जनता माविका शिक्षक पवनकुमार झाले नगरप्रमुख र शिक्षा शाखा प्रमुखको आश्वासनमा नगरभित्रका सबै विद्यालय संचालन गरिएको जानकारी दिए । १० कक्षाका विद्यार्थीको एसइइ परीक्षाको फर्म भर्नुपर्ने र ११ कक्षामा रजिष्ट्रेशन फर्म लगायतका महत्वपूर्ण काम गर्नु पर्ने भएकाले तत्कालका लागि धर्ना स्थगित गरेर काम थालिएको झाले बताए ।
गत मंसिर ८ गते हरिपुर्वामा वासुदेव खनाललाई प्रमुख प्रशासकीय अधिकृतमा सरुवा गरे पनि उनी आउने नआउने अन्यौल रहेको नगर प्रमुख साहले बताए । सोही नगरपालिकामा घर भएका खानेपानी मन्त्री महेन्द्र राय यादव र नगर प्रमुख साहबीचको टकरावले गर्दा प्रमुख प्रशासकीय अधिकृत सरुवा भए पनि आउन मान्दैनन । नगर प्रमुख साहले चाहेको व्यक्तिलाई मन्त्री यादवले रोक्ने र मन्त्रीले पठाएको प्रमुख प्रशासकीय अधिकृतलाई नगर प्रमुखले आउने नदिने क्रम चलिरहेको छ ।
दुई नेताको लडाईंले गर्दा त्यहाँका जनता र शिक्षक कर्मचारी भने पीडित भएका छन् ।
Copyright © All right reserved to webtvkhabar.com Site By: Sobij
