काठमाडौं । नेपाली कांग्रेसकी नेतृ डा.डिला संग्रौलाले पार्टीका सबै संरचनामा महिलाको प्रतिनिधित्व निर्णायक बनाउन माग गरेकी छिन् । १४ औं महाधिवेशनका लागि साढे आठ लाख क्रियाशील सदस्यमा एक चौथाइ पनि महिला नपुगेको भन्दै डा.संग्रौलाले निर्णायक तहमा महिलाको प्रतिनिधित्व गराउने माग गरेकी हुन् । आधाभन्दा बढी जनसंख्या ओगटेका महिलाको प्रतिनिधित्व राज्य र पार्टीका विभिन्न निकायमा ३३ प्रतिशत बनाउने भनिए पनि व्यवहारमा कार्यान्वयन नभएको उनकाे भनाइ छ । 

‘आधा आकाशभन्दा बढी जनसंख्या ओगटेको महिलालाई राज्य र पार्टीका विभिन्न निकायहरुमा प्रतिनिधित्व गराउने संवैधानिक व्यवस्था गरे पनि व्यबहारमा लागू भने अझै हुन सकेको छैन । ३३ प्रतिशत महिलाहरुको प्रतिनिधित्व गर्ने भनिए पनि निर्णायक तहमा महिलाको उपस्थिति भने ज्यादै नगन्य छ,’ बिहीबार उनले भनिन्, ‘नेपाली कांग्रेसको विधानमा सबै तह र संरचनामा केही हदसम्म प्रतिनिधित्व गराए पनि निर्णायक तहमा जबसम्म महिलालाई पुर्याउन सकिदैन तबसम्म महिलाको योगदानको कदर हुन सक्दैन । आउँदो नेपाली कांग्रेसको १४ औं अधिवेशनमा करिब साढे आठलाख क्रियाशील सदस्य भएको जानकारी प्राप्त भएको छ । त्यसमा एक चौथाई पनि महिलाको उपस्थिति नभएको अवस्था छ ।’ 

२३ प्रतिशत महिलाले मात्र क्रियाशील सदस्यता प्राप्त गरि बुथ समितिदेखि केन्द्रसम्म प्रतिस्पर्धी गर्नु पर्ने अवस्था सृजना भएको उनको भनाइ छ । ‘हाम्रो जगलाइ अझै सुधार गर्न सकेका छैनौं । जे जस्तो अवस्थामा हामी  छौ त्यसबाट महिला बिचमा एकता ल्याइ आउँदो अधिवेशनबाट सबै संरचनामा महिलालाई निर्णायक तहमा पुर्याऔं,’ उनले भनेकी छिन् ।