सर्लाही । चन्द्रनगर गाउँपालिका कार्यालय सार्न खोजेको भन्दै आक्रोशित स्थानीयले नाडिमनस्थित कार्यालयमा तालाबन्दी गरेपछि स्थिति तनाबग्रस्त बनेको छ ।
गाउँपालिका अध्यक्ष महेन्द्र महतोले आफ्नै गाउँमा कार्यालय लैजान खोजेको भन्दै स्थानीयले उनका स्वकिय सचिवलाई आक्रमण गर्ने प्रयाससमेत गरेका थिए ।
भीड नियन्त्रण गर्न प्रहरीले १३ सेल अश्रुग्यास प्रहार गरेको छ । प्रहरीले व्यक्तिमाथि आक्रमण हुने अवस्था आएपछि अश्रुग्यास चलाउनु परेको बताएको छ ।
प्रहरीले बल प्रयोग गर्दा करिब डेढ दर्जन स्थानीय घाइते भएका छन् । प्रहरीतर्फ पनि चारजना घाइते भएको जिल्ला प्रहरी कार्यालयले जनाएको छ ।
चन्द्रनगर गाउँपालिकाको कार्यालय नाडिमनस्थित ७ नम्बर वडामा छ । गाउँपालिका अध्यक्षले उनकै घर भएको वडा २ मा कार्यालय सार्न खोजेको भन्दै कार्यालयमा तालाबन्दी गर्दै विरोध प्रदर्शनमा उत्रिएका थिए ।
प्रदर्शनमा नेपाली कांग्रेस र नेकपाका कार्यकर्ताहरु सहभागी छन् । गाउँपालिका अध्यक्ष जनता समाजवादी पार्टीका हुन् । गाउँपालिका अध्यक्ष महतोले कार्यालय नसरेको बताउँछन् ।
उनले शनिबार विशेष गाउँ सभा डाकेको उल्लेख गर्दै दुई तिहाइ सदस्यले निर्णय नगरेसम्म कार्यालय नसर्ने बताए ।
Copyright © All right reserved to webtvkhabar.com Site By: Sobij
