वेबटिभी खबर
काठमाडौं । डोल्पा जिल्लाको ठूलोभेरी नगरपालिका–३ धुपीचौरस्थित भेरी नदीको बीचमा फसेका चार जनालाई नेपाली सेना र सशस्त्र प्रहरीको संयुक्त टोलीले मंगलबार सकुशल उद्धार गरेको छ ।
त्रिपुरा सुन्दरी नगरपालिका–६ पालुङ बस्ने ३३ वर्षीय ललित बोहरा, २६ वर्षीय नन्द प्रसाद बोहरा, ३५ वर्षीय लाल कुमार बुढा र ३७ वर्षीय श्यामलाल बोहरा आज बिहान दाउरा लिन जाँदा नदीको बीचमा फसेका थिए ।
दाउरा संकलन गर्ने क्रममा लिन गएका उनीहरु नदीमा अचानक पानी बढेपछि बीचमा अडकिए । नदीको बीचमा मानिस फसेको सूचना पाएपछि सशस्त्र प्रहरी बलको नं.४६ गुल्म डोल्पाबाट सशस्त्र प्रहरी नायब उपरीक्षक दिपकराज भट्टको कमान्डमा खटिएको विपद् व्यवस्थापन तालिम प्राप्त सुरक्षा फौज उद्धारमा खटियो । नेपाली सेना र सशस्त्रको संयुक्त टोली उद्धारमा परिचालन भएको थियो ।
चारै जनाको सकुशल उद्धारगरी उपचारको लागि जिल्ला अस्पताल डोल्पा पठाइएको छ । उनीहरूको अवस्था भने सामान्य छ ।
Copyright © All right reserved to webtvkhabar.com Site By: Sobij
