वेबटिभी खबर
काठमाडौं । जनता समाजवादी पार्टी नेपाल (जसपा) का अध्यक्ष उपेन्द्र यादव पक्षले निर्वाचन आयोगसमक्ष पार्टीको आधिकारिकता दाबी गरेको छ ।
अध्यक्ष यादवसहित संघीय परिषद् अध्यक्ष डा.बाबुराम भट्टराई, अशोक राई, राजेन्द्र श्रेष्ठ, लालबाबु राउतलगायत शीर्ष नेताहरू आयोगमै पुगेर पार्टीको आधिकारिकता दाबी पेश गरेका हुन् ।
दाबी पत्रमा यादव पक्षका ३० जना कार्यकारिणी सदस्यहरूले हस्ताक्षर गरेका छन्, सो पत्र आयोगमा दर्ता भएको छ । आयोगले राजनीतिक दलसम्बन्धी दफा ५१ अनुसार विवरण अध्यावधिक गर्न अस्वीकार गरेपछि यादव पक्षले आधिकारिकता दाबी गरेको हो ।
१८ जेठमा अध्यक्ष यादवले अर्का अध्यक्ष ठाकुरसहित चार नेतालाई कारबाही गरेका थिए, लगत्तै ठाकुरले यादवलाई कारबाही गर्दै पार्टीबाट निष्काशन गरेको पत्र निर्वाचन आयोगमा दर्ता गराएका थिए ।
तर, आइतबार (३० जेठमा) आयोगले दुवै पक्षले गरेको कारबाहीलाई मान्यता दिन नसकिने निर्णय गरेपछि दुई अध्यक्षहरू जसपामा आफ्नो पक्षलाई आधिकारिक देखाउने संघर्षमा छन् ।
Copyright © All right reserved to webtvkhabar.com Site By: Sobij
