वेबटिभी खबर
काठमाडौं । किराना सामान ढुवानी गर्ने ट्रकमा लुकाएर लैजाँदै गरेको १८ पोका भन्सार छलेको लत्ताकपडा सशस्त्र प्रहरीले पाल्पाबाट नियन्त्रणमा लिएको छ ।
रूपन्देहीको भैरहवाबाट म्यादीतर्फ जाँदै गरेको लु २ ख ५४५३ नम्बरको ट्रक पाल्पा जिल्लाको तानसेन नगरपालिका–१ राईडाँडा स्थित सिद्धार्थ राजमार्गबाट राति नियन्त्रणमा लिइएको हो ।
ट्रकका चालक फरार भएका छन् भने सहचालक रूपन्देहीको बुटवल उपमहानगरपालिका–१३ बेलबास बस्ने युवकलाई नियन्त्रणमा लिइएको छ ।
सशस्त्र प्रहरी बल नेपाल मुख्यालयको विशेष सूचनाको आधारमा सशस्त्र प्रहरी बल नेपाल नं. ३५ गुल्म पाल्पाबाट खटिएको सुरक्षा फौजले बिलबिजक नभएको अवैध रूपमा भित्रिएका कपडा सहितको ट्रक नियन्त्रणमा लिएको हो ।
ट्रकमा किराना तथा खाद्यान्नका सामान भित्र १८ पोका लत्ताकपडा लुकाई छिपाई राखिएको अवस्थामा फेला परेको छ । ट्रकमा रहेको किराना तथा खाद्यान्न सामानको बिलबिजक भने भेटिएको छ ।
रूपन्देहीको सिद्धार्थनगर–४ गल्लामण्डी भैरहवाको प्रतीक किराना स्टोरबाट सम्झना ट्रेडर्स म्याग्दी बेनीको नाममा बनाइएको बिलबिजक सहितको किराना सामानमा लुकाएर कपडा लैजान लगिएको थियो ।
नियन्त्रणमा लिएको ट्रक र सहचालक सहित आवश्यक कारबाहीको लागि लागि राजश्व अनुसन्धान कार्यालय बुटवल रूपन्देहीमा बुझाइएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए ।
Copyright © All right reserved to webtvkhabar.com Site By: Sobij
