काठमाडौं । प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङदेम्बेले प्रधानमन्त्री बालेन्द्र शाहसँग भेटवार्ता गरेका छन् । सोमबार भएको भेटवार्तामा रसुवाका बाढी तथा विपद् प्रभावित क्षेत्रको पुनःस्थापना, राहत, कानुनी जटिलता, विकास निर्माण तथा संसद्मा प्रधानमन्त्रीको उपस्थितिलगायतका विषयमा छलफल भएको आङदेम्बेले जानकारी दिए ।

उनले भने, ‘प्रधानमन्त्रीज्यूसँगको भेटमा मुख्यगरी रसुवामा बाढी र विपद्का कारण प्रभावित भएका क्षेत्रको पुनःस्थापना, राहत तथा उद्धारका विषयमा छलफल भयो । राजमार्गसँग सम्पर्कविच्छेद भएका विभिन्न वडामा बेलीब्रिजलगायतका पूर्वाधार निर्माण गर्नुपर्ने, त्यसका लागि आवश्यक बजेटको व्यवस्था गर्ने तथा कानुनी जटिलता भए त्यसलाई समाधान गरेर काम अघि बढाउने विषयमा पनि हामीले ध्यानाकर्षण गरायौँ । साथै, संसद्मा उठेका विषयको गम्भीरतालाई बुझेर प्रधानमन्त्री संसद्मा उपस्थित हुनुपर्ने विषयमा पनि मैले आग्रह गरेको छु ।’

रसुवाको गोसाइँकुण्ड र आमाछोदिङ्मो गाउँपालिकाका विभिन्न वडाहरू राजमार्गसँगको सम्पर्कबाट विच्छेद भएको उनले जानकारी दिए । ती क्षेत्रमा बेलीब्रिज निर्माण तथा अन्य आवश्यक पूर्वाधारको व्यवस्था गर्नुपर्ने विषयमा प्रधानमन्त्रीलाई जानकारी गराइएको उनले बताए । विभिन्न मन्त्रालयसँग सम्बन्धित कानुनी तथा प्रक्रियागत अवरोध भए त्यसलाई हटाएर आवश्यक योजना प्रस्तुत गरी बजेटको व्यवस्था गर्दै काम अघि बढाउनुपर्ने विषयमा पनि छलफल भएको आङदेम्बेले जनाए । भेटमा प्रधानमन्त्री शाहको संसद् उपस्थितिको विषय पनि आफूले उठाएको उनले बताए । संयुक्त राष्ट्रसंघको महासभामा सहभागी हुनुअघि संसद्मा उठेका विषयबारे जानकारी गराउन आग्रह गरेपनि समय अभावका कारण त्यसबेला भेट हुन नसकेको उनको भनाइ थियो ।

महासभाबाट फर्किएपछि प्रधानमन्त्री संसद्मा उपस्थित भएर सांसदहरूले उठाएका विषयको गम्भीरताबारे जानकारी लिनुपर्ने र सरकारको धारणा संसद्मै राख्नुपर्नेमा आफूले जोड दिएको आङदेम्बेले बताए । संसद्मा प्रधानमन्त्रीको उपस्थितिले उठाइएका विषयलाई अन्तर्राष्ट्रियकरण गर्न तथा कूटनीतिक रूपमा थप बलियो बनाउनसमेत सहयोग पुग्ने उनको भनाइ थियो । त्यस्तै, सञ्चार तथा क्षेत्रीय सहकार्यसँग सम्बन्धित विषयमा पनि छलफल भएको उनले बताए । प्रधानमन्त्रीले उठाउँदै आएको त्रिदेशीय सहकार्यलाई सीमित नराखी हिन्दुकुश हिमालय क्षेत्रसँग सम्बन्धित सबै मुलुकसँग पहुँच विस्तार गर्दै अघि बढ्नुपर्ने सुझाव आफूले दिएको आङदेम्बेले जनाए ।