वेबटिभी खबर
काठमाडौं । भूकम्पमा परेर घाइते भएकाको उपचारका लागि सशस्त्र प्रहरी बलले चिकित्सकको टोली जाजरकोट र रुकुम पश्चिममा खटाएको छ ।
शुक्रबार जाजरकोट जिल्लाको बारेकोट रामीडाँडा केन्द्र बिन्दु बनाएर गएको भूकम्पमा परी घाइते तथा अंगभंग भएकाहरूको उपचारको लागि सशस्त्र प्रहरी बल नेपालबाट डा. रोशन पराजुली र डा. निश्चल घिमिरेको कमान्डमा दुई वटा स्वास्थ्यकर्मीको टोली परिचालित भएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए ।
डा. पराजुलीको कमान्डमा खटिएको स्वास्थ्यकर्मीको टोलीले रुकुम पश्चिम जिल्लाको मिसन अस्पताल चौरजहारीमा रहेर घाइतेहरूको उपचार गरिरहेको छ भने डा. घिमिरेको टोलीले जाजरकोट जिल्लाको जिल्ला अस्पताल जाजरकोटमा रहेर स्वास्थ्य सेवा प्रदान गरिरहेको छ ।
भूकम्पपछि नेपाल एपीएफ अस्पताल बलम्बुबाट डा. पराजुलीको कमान्डमा ९ जना रुकुम पश्चिमको लागि र सशस्त्र प्रहरी बल नेपाल नं. ६ महेश्वरी बाहिनी मुख्यालय सुर्खेतबाट डा. घिमिरेको कमान्डमा ४ जना स्वास्थ्यकर्मीको टोली जाजरकोटको लागि खटिएको थियो ।
Copyright © All right reserved to webtvkhabar.com Site By: Sobij
